Mikkelparken i Kinsarvik beskriv seg sjølv som parken for småbarnsfamilien. Der kan dei yngste barna kjenna på meistring sidan dei får lov til å ta mange av attraksjonane sjølv.
I år kan dei freista med fleire store og små nyheiter i parken.
Men det dei sjølv synest der det som er mest spennande, er at dei har fått meir plass til enno fleire attraksjonar og enno fleire barndomsminne.
– På det nye arealet har me fått inn eit stort nytt leiketårn med åtte sklier i ulike høgder og formasjonar. Det er kome fleire gravemaskiner og to nye heisekranar – til glede for små framtidige maskinførarar, seier driftsleiar i Mikkelparken, Inga Måkestad, før ho legg til:
– Me har også kjøpt inn massevis av mjuke, magnetiske byggeklossar som me har innandørs. Me diggar å sjå alle dei kreative og fargerike konstruksjonane til gjestene.
– Som eit sydenparadis
Ho kan røpa at hennar personlege favoritt i parken er badelandet «Tropefryd». Spesielt på sommaren når det er sol og fint vêr ute.
– Då er det som å vera i eit sydenparadis. Og når vêret ikkje er på sitt beste, er det framleis tropevarme i vatnet. Det å høgre barnelatter og plasking frå skliene er ein lyd som gler oss som jobbar her, seier Inga Måkestad.
Sjølv om det til ei kvar tid er tropevarme i «Tropefryd», kan Inga fortelja at besøkstalet i parken varierer litt ut frå vêret. Likevel trur dei på ein ny sommar og ein juli-månad mange besøkjande.
– Veldig mange har vore rekordtidleg ute for å sikra seg billettar, då me i fjor opplevde å vera utseld fleire veker fram i tid. I år har me auka kapasiteten i parken, sidan det ikkje er koronarestriksjonar meir. Det er framleis ledige billettar, seier ho.
