Kodefest på biblioteket: Berre tilgang for jenter

Jenter over heile Noreg har fått vera med på Girl Tech-fest. Målet er at fleire jenter skal interessera seg for teknologi.

– Sjå kva eg klarte! jublar Nigina Emamoddin (10).

Ho og Marthea Folkestad Nicholls (9) har klart å koda ein databrikke med led-lys til å blinka «Hei» – og namna deira.

– Det er veldig kjekt å vera her, seier dei i kor.

– Det er gøy og vanskeleg. Me må konsentrera oss, seier Nigina.

Frå slim til video

På biblioteket på Stord har 5. klasse-jenter frå Litlabø skule og Sagvåg skule fått vera med på ei rad stasjonar. Her har dei fått prøva seg forskjellige problemsløysingsoppgåver med ipadar, koding, laga video – og slim.

– Det var veldig kjekt å få vera med på å laga slim, og iPad-ane var også morosame, fortel Nigina Emamoddin.

KODAR: Nigina Emamoddin (10) og Marthea Folkestad Nicholls (9) synest det er kjekt med Girl Tech Fest. Dei får god hjelp av Anniken Sagli, student ved Høgskulen på Vestlandet.

Ho fortel at ho er interessert i data.

– Eg elskar å hjelpa folk, så eg har lyst til å læra meir om data, slik at eg kan hjelpa andre.

Når Nigina blir vaksen har ho lyst til å bli lege. Marthea har lyst til å bli frisør.

Utan gutar

I haust er det 1500 jenter 15 stader i Noreg som har fått vera med på Girl Tech Fest. Gutane i klassen har vanleg undervising.

– Eg trur nok gutane er litt misunnelege på oss, seier Nigina.

Jentene er einige i at det er kjekt at jentene er for seg sjølv av og til.

TRYKK DER: Almira June Ersland (10) og Leah Nerhus Bjelland (10) lærer å koda på pc.

Jenter blir mindre oppmuntra til å velja teknologifag

Framleis er det sånn at fleire gutar enn jenter veljer utdanning innan teknologi.

Forskarar ved Vestlandsforsking har funne ut at jenter i mindre grad enn gutar blir oppmuntra til å velja teknologifag. Dei meiner derfor det er behov for fleire tiltak som kan få jenter til å velja teknologifag – som for eksempel Girl Tech Fest.