Kakapoen kan ikkje fyka, den kan bli heile 4 kilo tung, den ser litt ut som ei ugle i ansiktet, og han er berre vaken om natta. Slik blir han også kalla nattpapegøye, eller uglepapegøye.
Lett byte
Då maoriane kom til New Zealand for om lag 700 år sidan, jakta dei på kakapoen for å få tak i kjøtet, skinn og fjør. Sidan han ikkje kunne fyka så var han eit lett byte.
Då europearane kom, hadde dei med seg kattar og rotter, noko som blei katastrofalt for kakapoane. Dei finst nemleg berre på New Zealand.
Dronten frå Mauritius
Dronte-fuglen frå Mauritius deler mykje av den same historia som kakapoen, berre at han blei heilt utrydda på 1600-talet.
Ei stund såg det ut for at kakapoen også var utrydda. Heldigvis viste det seg at det ikkje stemde, og i 1989 starta det første verningsarbeidet opp.
Papegøyesuperstjerna Sirocco
Kakapoen Sirocco, som blei sjuk som liten, måtte oppfostrast av menneske og trivst ikkje saman med andre kakapoar. I staden reiser han rundt og er med på TV og internett for å minna folk om å ta vare på kritisk truga dyr og fuglar.
Sidan kakapoen kan bli 90 år gammal, har 27-åringen Sirocco framleis mange år framfor seg som verdsstjerne. Forhåpentleg vil det bli mange nye kakapokyllingboomar i hans levetid.
