Fleire millionar barn og ungdommar over heile har gått i klimastreik i 2019. Greta Thunberg har inspirert mange gjennom skulestreiken ho byrja med hausten 2018. Nyleg blei ho kåra til Årets person av det amerikanske magasinet TIME for innsatsen sin – som den yngste nokosinne.
Elles i utlandet har Donald Trump fått mykje merksemd i år også. Han er i ferd med å bli stilt for riksrett for å ha misbruka makta si. Han har òg vore under etterforsking for russisk innblanding i presidentvalet han vann for tre år sidan.
Nytt parti i den norske regjeringa
Her i Noreg fekk me ei firepartiregjering i januar då også Kristeleg Folkeparti med i regjeringa – saman med Høgre, Frp og Venstre.
Kjell Ingolf Ropstad blei leiar av KrF og barneminister. Men det er ikkje det som har gledd han mest i år.
– Å bli pappa for andre gang i haust er det som har gledd meg mest! seier han til Framtida Junior.
– Kva har skuffa deg mest i 2019?
– Eg skulle ønske at vi hadde fått til endå meir for barn som har det vanskeleg. Mange barn veks dessverre opp i familiar med dårlig råd, og det kan vere for dyrt å delta i fritidsaktivitetar. Difor vil vi innføre fritidskort for alle barn, noko som vil gjera det mogleg å delta uavhengig av kor mykje foreldra deira tener.
– Kva er håpet ditt for 2020?
– Eg håpar at vi kan kome eit steg nærare klimamåla, og så vil eg gjerne at vi kan få til endå meir for barn som på ulikt vis har det vanskeleg.
