– Dette er ikkje berre pinleg. Det er eit moralsk og politisk svik mot menneske i desperat trong for vern, seier Maria Louise Hundeide. Ho er leiar i Norsk Folkehjelp Solidaritetsungdom.
– Å snu ryggen til verdas mest sårbare
Ein overføringsflyktning, eller «kvoteflyktning», er ein person som ikkje har fått tilgang til eit land, og som er i fare i sitt eige land. Ved hjelp av eit FN-organ, FNs høgkommissær for flyktningar, får flyktningen eit land å bu i.
No foreslår regjeringa i Noreg at dei skal setje talet for desse flyktningane til 100 personar. Det er det lågaste talet på 40 år.
Norsk Folkehjelp Solidaritetsungdom poengterer at dette skjer i eit tid der verda aldri har hatt så mange menneske på flukt.
– Noreg har både kapasitet og eit ansvar for å stille opp. Å kutte til 100 kvoteflyktningar er å snu ryggen til verdas mest sårbare, seier Hundeide.
To rutebussar
I 2023 sette Noreg kvota til 2000 overføringsflyktningar. I statsbudsjettet for 2025 var kvota 500.
FNs høgkommissær for flyktningar har bedd Noreg om å ta imot 5000 kvoteflyktningar.
– Noreg har kapasitet til å ta imot langt fleire enn berre 100. Dette er omtrent det same talet som to rutebussar, seier Hundeide.
