Åse Kristin Ask Bakke
- Alder: 25
- Yrke: Sjukepleiar
- Frå: Harøya, Ålesund kommune
- Leiger leilegheit i Ålesund saman med ei venninne.
- Elskar å vera på sjøen. – Eg er vaksen opp med seglbåt og kajakk, fortel ho.
Bakke er frå Harøya i Ålesund kommune og jobbar som sjukepleiar. Ho gler seg over å få representere dei unge, heimfylket og partiet sitt på Stortinget.
– Det er kjekt å sjå at så mange unge kjem inn. Det viser at når unge engasjerer seg, kan vi forandre både lokalsamfunn og landet, seier ho.
– Viktig representasjon
Det er valt inn 14 representantar på Stortinget som er under 30 år. Åse Kristin Ask Bakke meiner det er viktig at heile folket er spegla i maktens korridorar, anten det er snakk om geografi eller alder.
Ho trekker fram arbeidsmarknaden, klimakrisa og bustadpolitikken som viktige saker som dagens unge kjenner på kroppen.
– Det er vår framtid det handlar om. Politikken som vert laga og ført i dag, er det vår generasjon som skal forvalte, seier Bakke.
Byrja i ungdomsrådet
Bakke fekk sitt første møte med politikken i ungdommen. Ho engasjerte seg i ungdomsrådet og gjekk for første gong på talarstolen i heimkommunen for å kjempe for sommarjobbar, ungdomsklubb og MOT-ordninga. Kommunestyret lytta til ungdommane, og dei fekk gjennomslag.
– Då lærte eg at det funkar å engasjera seg. Ein kan forandra ting! Det håpar eg unge sit att med: at når ein engasjerer seg, kan ein forandra verda til det betre. Om det er i lokalsamfunnet, gjennom ungdomsrådet eller på Stortinget. Vi får det til bit for bit, seier Bakke.
