Hai
- Dei fleste haiar er rovdyr og har skrape tenner i fleire rekkjer i munnen.
- Dei fleste haiar lever i 20–30 år, men nokre kan blir 70–100 år.
- Haiane som lever lengst er håkjerringane, som kan bli 300 år.
- Brugde, håkjerring, kamtannhai og pigghå er blant haiane som finst i Noreg.
- Kvithai, tigerhai og oksehai er dei farlegaste haiane og dei finst ikkje i Noreg.
Kjelde: Vesle norske leksikon
Sjølv om haiar sjeldan angrip menneske utan grunn, har det vore ein auke i bitingar dei siste åra. Forskarar meiner dette handlar om at menneske beveger seg alt for nær haiar ute i havet – ofte for å få ein bra video dei kan poste i sosiale medium, skriv BBC.
Berre det siste året har tre kjende menneske blitt bitne. Brasilianske Tayana Dalazen er ein av påverkarane som har sumt med haiar. Då ho var ute i havet med dei store fiskane, kjende ho plutseleg at noko beit henne i foten.
– Det var veldig smertefullt, men eg var roleg for eg visste at eg ikkje kunne slåst mot dyret, seier Tayana til BBC.
Det var ein to meter lang ammehai som hadde sett tennene i påverkaren. Etter nokre sekund sleppte haien taket og påverkaren kom seg trygt unna.
Nærkontakt plagar haiane
Forskarar understrekar at haiar ikkje er stygge monster, men ville rovdyr som treng rom rundt seg utan å bli forstyrra.
Dersom menneske kjem for nær haiar, kan dei fort reagere med å bite. Dette kan dei gjere både for å forsvare seg og for å utforske.
Nokre påverkarar meiner at dei lagar innhald med haiar for å vise at dyra er ufarlege og at det er viktig å ta vare på dei. Dette meiner forskarar ikkje er god nok grunn til å bevege seg nær og plage haiar.
