Sjøholmen kulturhus arrangerte «Unge kunstnaras haustutstilling» i september. På denne kunstutstillinga kunne kunstnarar i alderen 4 til 19 år sende inn sine kunstverk. Ein av kunstnarane som fekk vist fram sine kunstverk, var 12 år gamle Nikolai Lien Kvam.
– Eg har alltid likt å vere kreativ, seier han.
Til kunstutstillinga hadde han laga nokre teikningar med blyant, eit sett borkebåtar som han hadde spikka og dekorert, ei skisse med akvarell og eit akrylmåleri.
– Eg har drive med teikning frå eg var liten og har gått på fleire teiknekurs. I tillegg har farmor og bestemor inspirert meg til å teikne og måle. Farfar laga også borkebåtar då han var ung, fortel Nikolai.
Han har fleire tips til barn som vil lage kunst.
– Først og fremst må dei finne noko å drive med som dei liker å halde på med. Det er også lurt å gå nokre kurs for å lære litt meir teknikk. Eit anna tips er at det er mykje å bli inspirert av på YouTube, seier Nikolai.
