Torsdag 5. mars godkjende ministrar frå EU-landa klimamålet på eit møte i Brussel. Målet er at utsleppa skal kuttast med 90 prosent innan 2040.
Når noko blir godkjent på denne måten, blir det også ein del av lovene i EU.
Allereie 10. februar vedtok EU-parlamentet målet. Det skjedde etter at politikarar frå EU-parlamentet og ministerrådet hadde forhandla og blitt einige om planen.
Klimakvotar
Likevel kan ikkje alle utsleppa kuttast direkte. Inntil 5 prosent av kutta kan skje ved at land kjøper klimakvotar. Det betyr at eit land kan betala for at utslepp blir kutta ein annan stad i verda.
Her er eit eksempel: Tenk deg at eit land ikkje klarer å kutta alle utsleppa sine sjølv. Då kan landet betala for eit prosjekt som plantar mange tre eller lagar rein energi i eit anna land. Då blir utsleppa mindre der i staden.
Men sjølv med dette må utsleppa i EU vere minst 85 prosent lågare enn dei var i 1990 innan 2040.
EU har også eit større mål: Innan 2050 skal EU vere klimanøytralt. Det betyr at utsleppa av klimagassar ikkje skal vera større enn det naturen klarar å ta opp igjen.
