Veit du kva som skjer med det avklipte håret ditt når du er hos frisøren? Truleg går det rett i søppelbytta.
Men fleire organisasjonar vil ha ein slutt på dette. Dei meiner nemleg at håret kan kome til nytte, sjølv når det ikkje er på hovudet ditt.
Menneskehår mot oljesøl
Organisasjonar i fleire land har begynt å samle inn håret som hamnar på golvet hos frisøren. Dette håret vaskar dei, og så brukar dei det til å lage matter!
Organisasjonane håpar mattene kan vere nyttige til å hindre skadane frå oljesøl. Menneskehår trekker nemleg til seg olje.
Konsekvensane av oljesøl kan vere store – det kan føre til forureina drikkevatn, og er ein risiko for både plante- og dyreliv.
For å lage ei matte treng ein éin kilo menneskehår. Kvar matte kan trekke til seg sju-åtte liter olje, seier belgiske Patrick Janssen til nyheitsbyrået Reuters.
Han er medgrunnleggjar av organisasjonen The Hair Recycle Project, som lagar slike matter.
– Alle kan lage ei hårmatte
Den amerikanske organisasjonen Matter of Trust var tidleg ute. Dei har laga hårmatter sidan år 2000. Organisasjonen har lokale partnarar som produserer matter i 17 land verda over.
– Alle kan lage ei hårmatte. Det skapar grøne jobbar, det reinsar vatnet, det reduserer avfall i landsdeponi, og det promoterer fornybare ressursar, seier grunnleggjar Lisa Gautier til CNN.
Ho gler seg over at rørsla veks. I fjor vart 550 frisørsalongar i Storbritannia og Irland einige om å samle opp hår.
