I går fylte dronning Elizabeth II 96 år, og i år har ho vore dronning i heile 70 år! Men sjølv om ho hadde sin faktiske bursdag i går, nøyer ho seg ikkje med ei enkelt feiring.
Dronninga har nemleg to bursdagar – ein den 21. april, og ein seinare på året. Den andre bursdagen feirar ho fast den andre helga i juni.
Men korleis er det eigentleg mogleg? Kvifor har ho to bursdagar, og korleis feirar ho dei?
Over hundre år gamal tradisjon
Tradisjonen ved å feira to bursdagar, kjem frå gammalt av i det britiske kongehuset.
Det heile starta med oldefaren til Elizabeth, Edward VII.
Han var konge frå 1901 til 1910, og var fødd i november. Men sidan november ikkje er månaden for det beste vêret i Storbritannia, bestemte han seg for å kombinera feiringa med ein stor og årleg militærparade om sommaren, skriv BBC Newsround.
Denne tradisjonen har dronning Elizabeth ført vidare.
Familietid og folkefest
Dronninga pleier å feira den ordentlege bursdagen sin i april, saman med familien. Dagen blir markert med saluttar, lik dei som er i Noreg på 17. mai, tre forskjellige plassar i London.
Det blir skote salutt med 41 kanonar i Hyde Park, med 21 kanonar i Windsor Great Park og med 62 kanonar ved Tower of London.
Derimot går den ordentlege feiringa føre seg den andre helga i juni. Då er det vanlegvis ein stor parade i London, der meir enn 1400 soldatar, 200 hestar og 400 musikarar stiller opp for å laga fest.
Det er tradisjon at kongefamilien er ein del av seremonien. Som det norske kongehuset på 17. mai, samlast dei på Buckingham Palace for å helsa på folket.
