Desse bøkene er nominert til Bokslukerprisen 2021/22

Bøkene er valde ut på bakgrunn av vurderingar frå 48 anmelderklasser rundt omkring i Noreg. Ein av klassane er frå Byskogen skule i Tønsberg, og ifølgje lærar Birgit Halvorsrød var det umiddelbart eit stort engasjement blant elevane då dei fekk oppdraget, skriv Foreningen !les i ei pressemelding.

– Dei fleste elevane har lese bøker dei mest sannsynleg ikkje ville valt ut sjølv, og har funne ut at bøkene var knallbra. Vi brukte mykje tid i starten og jobba masse med å skriva meldingar, seier Halvorsrød og legger til:

– Dette oppdraget har verkeleg samla klassen. Dei har utvikla ein stor leseglede og hjelper kvarandre med entusiasme til å finna nye bøker å lesa.

Fin og variert liste

Prosjektleiar for Bokslukerprisen i Foreningen !les, Troels Posselt, er godt fornøgd med innsatsen til anmelderklassane, og synest det har vorte ei interessant liste med nominerte bøker.

– Anmelderklassane har gjort ein imponerande jobb i ei vanskeleg tid. Eg synest dei nominerte bøkene utgjer ein veldig fin og variert liste. No gler eg meg til at nærare 125.000 barn i løpet av hausten skal lesa og seia meininga si om dei ti utvalde, seier han.

Dette er dei ti nominerte bøkene: 

• Hetebølge av Dag Otto Lauritzen og Frode Eie Larsen, Kagge forlag 2021
• Lappjævel! av Kathrine Nedrejord, Aschehoug 2020
• Ti kniver i hjertet av Nora Dåsnes, Aschehoug 2020
• Eg har venta på deg av Atle Hansen, Samlaget 2020
• Bare Victor av Victor Sotberg og Erik Eikehaug. Illustrert av Charlotte Sandmæl, Gyldendal 2020
• Hør’a dagbok av Amina Sewali, Aschehoug 2020
• Charlie Drømmevandrer. Fangene i Adnafjell av Svein Tindberg, J. M. Stenersen forlag 2020
• Hva skjedde egentlig med deg? av Jenny Jordahl, Cappelen Damm 2020
• Spådama i 7B av Harald Nortun, Samlaget 2020
• Jeg er Leona av Line Baugstø, Aschehoug 2020

Les også: Favoritten til Malin og Thea vann Bokslukarprisen

Les også: Vann Bokslukarprisen med skummel bok: – Dei fleste likar å bli litt skremt