Påska er den viktigaste kristne høgtida. Blant kristne blir påska feira til minne om då Jesus døydde og vart levande igjen.
Mange av påsketradisjonane vi har i dag har røter i kristendommen, mens andre ikkje har det.
Påskeegg
Egg har sidan før kristendommen vore eit bilde på nytt liv. Spesielt i land rundt Middelhavet har det vore lang tradisjon for å samla inn fugleegg på våren. Desse vart dekorerte og ete for å markere ein ny start på våren.
Tidleg i mellomalderen (år 500–1500) begynte egget også og bli brukt som eit bilde på Jesu oppstandelse – at Jesus vart levande igjen etter å ha døydd.
Framleis kan truande menneske ta med seg egg i kyrkja for å få det velsigna. Å velsigne betyr å overføre lykke frå Gud på noko eller nokon. Det er det gjerne ein prest som gjer.
Appelsin
I påska er det vanleg å ete appelsin og mange tek gjerne med seg den gule, søte frukta i tursekken.
Årsaka til at det har blitt tradisjon å ete appelsin i påska er at det før i tida var rundt påsketider at appelsinane var best og mest tilgjengelege i Noreg. Trass at vi no kan få tak i appelsinar heile året, er frukta framleis populær rundt påsketider.
Påskelam
I mange heimar er det tradisjon å ete lammelår til middag påskeaftan. Dette har mellom anna røter i kristendommen.
I kristendommen symboliserer lammet Jesus – ein som uskuldig vart ofra. Å symbolisere betyr å vere eit bilde på noko anna enn det det faktisk er. Å ofre betyr å gi frå seg noko eller drepe noko.
I Noreg vart det først tradisjon å ete lam i påska på 1990-talet. Då var norske kjøtlager overfylt med lammekjøt. For å få folk til å kjøpe lammekjøtet køyrde Opplysningskontoret for kjøt ein kampanje for å få folk til og ete lam i påska, noko som fungerte.
Ein kampanje er ein plan for å påverke menneske på ein bestemt måte.
Påskehare
Ifølgje tradisjonen kjem påskeharen med påskeegg fylt med godteri til barna. Påskeharen kan også finne på å gøyme egga så barna må leite etter dei.
Denne tradisjonen kjem frå Tyskland og starta på 1600-talet. På 1850-talet begynte det å bli laga godteri, leiker og postkort med påskeharen.
Etter kvart tok tyskarar som flytta ut av landet med seg påskehare-tradisjonen. Tradisjonen er spesielt sterk i USA og Storbritannia, men også i andre land slik som Noreg.
