Det er miljøorganisasjonen Mountain to Sea Conservation Trust som har krona blobfisken til årets fisk på New Zealand, skriv BBC.
Organisasjonen har som mål å auke medvit rundt livet i vatnet i New Zealand – både livet i havet og i ferskvatn. Blobfisken, som blei årets fisk 2025, er utryddingstruga på grunn av fiske.
På djupt vatn
Blobfisken er ein djuphavsfisk og lever på 600–1200 meters djup i havet rundt Australia og New Zealand.
Fisken er godt tilpassa trykket som er så langt nede i havet, og i sitt naturlege habitat ser han meir eller mindre ut som ein «vanleg fisk».
Hamnar fisken derimot oppe på land forandrar han seg kraftig grunna trykkendringa. Blobfisken blir då til ein geleaktig masse og får ein spesiell utsjånad. Basert på denne tilstanden blei han kåra til verdas styggaste dyr.
