Foto: Children vs. Climate change
Under klimatoppmøtet i New York leverte Alexandria Villaseñor (14) ei formell klage på dei fem landa.
– Det har gått 30 år sidan dei signerte Barnekonvensjonen og verdsleiarane har ikkje halde det dei lova. Dei lova å beskytta rettane våre, men det har dei ikkje gjort, sa Greta Thunberg som også var med.
Har gløymt avtalen
Ungdomane meiner at landa dei har klaga inn til FN, har brote barnerettane ved å ikkje ta nok grep for å stoppe klimakrisa.
– Barnekonvensjonen dei signerte, sikrar alle barn sine rettar. Den er til for oss. Men det ser ut til at verdas leiarar har gløymt forpliktingane sine. Avtalen seier at land må verna om og respektera alle barn si rett til liv, helse, kultur. Det gjer dei ikkje, sa Villaseñor.
Landa som er klaga inn, er nokon av dei største utsleppslanda både historisk og i dag. Dei er med på å varma opp jorda og skapa konsekvensar som havstiging og meir ekstremvêr.
Barnekonvensjonen
Barnekonvensjonen blei vedtatt 20. november 1989. Det er ein avtale som går på alle menneskerettar barna har krav på.
Noreg kan ikkje klagast inn
USA, som ligg på utsleppstoppen, har ikkje forplikta seg til klageprotokollen, og kan derfor ikkje klagast inn til FN. Det same gjeld Kina, som ligg på andreplass på utslepp. Noreg har forøvrig ikkje forplikta seg til dette heller, og kan dimed ikkje klagast inn.
