Det viser ein ny studie frå Australia. Forskarane følgde elevar som starta på ungdomsskulen, og fann at både trivsel, optimisme og lykkekjensle gjekk ned etter skulebytet, skriv NRK.
– Altfor ofte blir mistrivsel i dei tidlege tenåra avvist som ein del av den normale utviklinga. Forskinga vår tyder på at sjølve overgangen er ei viktig årsak til dette, seier doktorgradsstipendiat Mason Zhou i ei pressemelding.
Forskarane fann også at elevane vart meir bekymra etter at dei byrja på ein ny skule.
– Litt gløymt i Noreg
Førsteamanuensis Gro Marte Strand ved NTNU meiner overgangen til ungdomsskulen treng meir merksemd.
– Det er bra at me får slike studiar og tal fram, for overgangen til ungdomssteget treng meir merksemd. Særleg i Noreg er denne litt gløymd, seier ho til NRK.
Ho meiner elevar ofte treng meir støtte enn dei får i dag.
– Elevane har behov for meir støtte i denne overgangen enn det kanskje har vore tradisjon for å gi, og dermed har me også behov for meir kunnskap om kva og korleis, seier Strand.
Samtidig understrekar ho at dei fleste elevar får ein god start på ungdomsskulen.
