Saka er oppdatert med kommentar frå Folkehelseinstituttet (FHI).
Måndag gjekk Verdas helseorganisasjon (WHO) ut og godkjente det danske selskapet Bavarian Nordics sin vaksine mot m-koppar til unge i alderen 12–17 år, melder nyheitsbyrået Reuters.
Vaksinen Jynneos er allereie godkjent for bruk blant vaksne, og er godkjent for 12–17-åringar av EU.
Global helsekrise
M-koppar har råka Kongo og andre afrikanske land hardt i fleire omgangar. I august erklærte WHO utbrotet for ei global helsekrise.
Sjukdommen vart tidlegare kalla «apekoppar», og smittar gjennom tett hudkontakt.
Nordmenn treng ikkje vera bekymra
I august uttala vaksineforskar ved Universitetet i Oslo, Gunnveig Grødeland, til VG at Noreg burde vurdera å innføra koppevaksinen att for alle barn.
Fagdirektør for avdeling for smittevern og vaksine avkreftar ovanfor Framtida.no at det er aktuelt.
– For innføring i barnevaksinasjonsprogrammet må sjukdommen vera ein reell helsetrussel. Det er lite som tyder på at m-koppar vil utgjera ein slik trussel blant barn i Noreg. Tilgangen på vaksine er dessutan avgrensa globalt. Den tilgjengelege vaksinen bør primært brukast i dei affiserte afrikanske landa som har betydeleg dårlegare helsetilbod enn me har i Noreg, skriv Andersen.
