Videoen av pytonslangen Shiva og eigaren Higor Fuiza blei sett av mange, ifølge BBC. Også miljø- og vitskapsdepartementet i Queensland såg videoen. Denne veka fekk eigaren av slangen ei bot på 2 322 australske dollar. Det er om lag 16 000 norske kroner.
Sette Shiva i fare
Dyrepolitiet seier eigaren braut løyvet på å ha slangen som kjæledyr. I tillegg sette han Shiva i fare. Då han tok slangen ut i vatnet, gjorde han Shiva stressa.
– Slangar kan svømme, men reptil unngår helst vatn, sa Jonathan McDonald frå dyrepolitiet i ein uttale.
– Vatnet ville vore ekstremt kaldt for pytonslangen, og dei einaste slangane som skal vere i havet, er havslangar, sa McDonald.
Ifølge BBC har eigaren tidlegare sagt til media at Shiva elskar vatn og at dei har surfa saman minst 10 gonger.
