I eit år har ukrainske folk kjempa for å ta tilbake landet sitt etter Russland invaderte. Skular, barnehagar og sjukehus er blitt øydelagde i av bombing og no sit nesten alle ukrainske barn utan straum, oppvarming og reint vatn, fortel UNICEF.
Sidan 90-talet
Det har vore spenning mellom dei to landa i mange år. Sidan Sovjetunionen vart oppløyst på 90-talet har dei to blitt meir og meir usamde. I 2014 tok Russland eit ukrainsk område som heiter Krim i ei annektering.
24. februar i fjor gjekk russiske styrker inn i Ukraina. Ifølgje den russiske regjeringa var målet å frigjera Ukraina frå eit udemokratisk regime.
Russland si regjering seier at det er mange etnisk russiske i Ukraina som ikkje blir behandla rettferdig av ukrainske myndigheiter, skriv BBC.
Russland er òg bekymra for at Ukraina skal bli med i NATO, slik mange av dei andre tidlegare Sovjetiske landa er blitt.
Presidenten i Ukraina, Volodymyr Zelenskyj har styrt landet sidan han vann valet 2019. Ukraina og mange vestlege land meiner invasjonen er ulovleg, fortel nyhendebyrået AP.
Internasjonal støtte
Etter invasjonen har mange land sendt stønad i form av pengar, utstyr og våpen til Ukraina. Blant anna har Noreg gjeve masse pengar til organisasjonar som driv med humanitært arbeid i områda råka av krigen.
Måndag kom USAs president Joe Biden på besøk i Ukraina for å visa støtte til ukrainsk sjølvstende.
– Putin trudde Ukraina var svakt, og at vesten var splitta. Han trudde me ikkje skulle stå saman. Han tok feil, sa Biden under ein pressekonferanse i hovudstaden Kyiv.
Illustrasjon: Erik Bolstad/Store norske leksikon.
CC BY SA 3.0-lisens
Hard motstand
Fleire ekspertar meiner Putin vart overraska over kor hardt ukrainske folk kjempa mot invasjonen. Etter eit år har ikkje Russland klart å ta over meir enn eit par område mellom Russland og Krim-halvøya, viser ei oversikt frå Live UA.
Ukraina har for det meste klart å kjempe tilbake russiske forsøk på å ta over landet deira.
