Nokon gangar må ein pasient med pacemaker operera, for for eksempel å fjerna ledningar eller elektrodar. Ein pacemaker er ein eit apparat som blir sett inn i kroppen. Det skal hjelpa menneske som har opplevd problemar med hjarterytmen.
Dei fleste stader i verda får slike pasientar narkose og søv seg gjennom operasjonen, men i Noreg pleier legane å bruka lokalbedøvelse. Det betyr at pasienten blir operert i vaken tilstand.
Hjelper dei som synest det er vondt eller skummelt
Stine Camilla Blichfeldt-Ærø fortel om pasientar som var mindre engstelege etter ein slik operasjon då dei kombinerte den med musikkterapi, skriv forskning.no.
– Det er ein del som har engstelse knytt til dette, seier ho.
Blichfeldt-Ærø er musikkterapispesialist og jobben hennar går ut på å sjå på korleis pasientane kan få hjelp til å oppleva at det verken er vondt eller skummelt.
– Det vi har sett no, er at musikkterapien faktisk lèt seg gjennomføra i ein slik situasjon.
Distraksjon frå smerta
Egil Andreas Fors samanliknar musikk med hypnose som ein måte å hanskast med smerte på. Fors er professor ved NTNU og står mellom anna bak to bøker om smerte.
– Du får ein distraksjon. Det treng ikkje å vera musikk – det kan godt vera noko anna. Ein lyd frå naturen, bølgjer eller sånne ting. Det er ikkje så mystisk, det er berre at hjernen blir distrahert frå smerta, seier Fors.
