– Det er gøy å vera Lucia! Eg får ha krone på meg, og det kjennest så fint å ha den på. Vi trekte pinnar om kven som skulle få gå med krona i år. På kvar pinne var det ulike namn, og mitt vart trekt!, fortel Elene.
Ho har drege den kvite skjorta over hovudet. No er ho klar for å fålys på hovudet, og får hjelp av Thea Vika Knudsen (8) og Lilly Åsheim Karlsen (8) til å sette dei på plass.
– Då eg fekk pinnen blei eg så kjempeglad at eg hoppa høgt. Nesten opp til himmelen, fortel Elene.
Var Lucia to gongar
Det var både kjekt og spennande å få æra av å ha dei fine lysa i håret.
– Eg kjente at eg var spent i magen. Det var som sommarfuglar flaksa, nei – flaggermus!
Elene fekk vera Lucia to gongar, både i toget på juletrefesten der alle foreldra for 1-4. klasse var invitert, og i dag. I dag går 3. klasse rundt for å synge Lucia-songen, og dele ut lussekattar til alle elevane på heile skulen.
– Eg har vore litt spent desse to kveldane før eg skulle vera Lucia, eg fekk liksom ikkje sova, fortel Elene.
Men kven var Lucia?
– Lucia gjekk i ein kvit kjole, og hadde lys i håret. Ho var ei dame som levde for veldig lenge sidan, og ho var hellig. Ho døydde, og difor feirar vi Lucia, seier ho.
