Terrorisme
Terrorisme er bruk av vald mot sivile (vanlege menneske) for å skape frykt og dermed påverke politikk. Ein terrorist er person som deltek i gjennomføringa av ei terrorhandling.
Kjelde: Store norske leksikon
Terrorangrepet, som gjerne blir kalla berre 11. september eller 9/11 på engelsk, skjedde då 19 terroristar kapra fire passasjerfly i USA. Å kapre betyr å bruke vald og truslar for å ta kontroll over eit transportmiddel.
Terroristane krasja to av flya inn i tvillingtårna i World Trade Center i New York, som bestod av to skyskraparar. I dette angrepet døydde 2753 menneske.
Terroristane krasja det tredje flyet inn i Pentagon. Der mista 184 menneske livet. Det er i Pentagon USAs forsvarsdepartement held til. Pentagon er hovudkvarteret til det amerikanske forsvarsdepartementet, som har ansvar for militæret og forsvaret til USA.
Det fjerde flyet styrta i bakken, og 40 menneske om bord omkom. Til saman døydde nesten 3000 menneske frå 93 forskjellige land i angrepet.
Følgjene av terrorangrepet
Dei 19 terroristane, som alle mista livet i terrorangrepet, kom frå Al-Qaida. Al-Qaida er ein terrororganisasjon som bruker vald for å forsvare muslimar mot påverknad og kontroll frå USA og andre ikkje-muslimske land.
Etter terrorangrepet 11. september 2001 erklærte USA krig mot terror. Dette innebar mellom anna at dei angreip Afghanistan fordi al-Qaida fekk halde til i landet. Som følgje av dette blei al-Qaida etter kvart svakare.
4,7 millionar menneske verda over har mista livet som følgje av krigen mot terror. Over 940 000 menneske har blitt drepne i krigføringa som skjedde i Irak, Afghanistan, Syria, Jemen og Pakistan mellom 2001 og 2023. Nesten halvparten av desse var sivile. Det opplyser NRK kjapt oppdatert.
Myndigheitene i USA sette også fleire hundre menneske i fengsel i etterkant av terrorangrepet, fordi dei trudde at dei samarbeidde med al-Qaida. Mange av dei blei sette i fengsel utan å bli dømde i ein domstol først, noko som er eit brot på menneskerettane.
Markering
For å markere at det er 25 år sidan terrorangrepet skjedde, var det onsdag kveld eit droneshow i New York. Det var 2977 dronar med ljos – eitt ljos for kvar av personane som blei drepne i terrorangrepet, utanom dei 19 terroristane som mista livet.
Under droneshowet blei omrisset av tvillingtårna gjenskapt.
– 100 millionar amerikanarar er for unge til å hugse dagen som endra byen og nasjonen vår for alltid, skriv 911memorial.org.
Dei skriv vidare at det er viktig å minne og lære dei unge som ikkje opplevde hendinga om kva som skjedde for 25 år sidan.
