Europeiske forskarar har sett på songar på engelsk frå åra 1980 til 2020. Dei såg på songar frå ulike sjangrar som pop, rock, rap, country og R&B.
– I alle sjangrane hadde tekstane ein tendens til å bli enklare og meir gjentakande, seier forskar Eva Zangerle ifølge forskning.no.
– Teksten festar seg lettare i dag, fordi han er lettare å hugse, seier ho.
Forskarane fann også ut at det hadde blitt fleire sinte songar. Særleg raptekstar hadde blitt sintare. Ein annan ting dei fann ut, var at popmusikk i dag oftare bruker orda «meg» og «mitt».
Forskarane meiner at songtekstar viser korleis samfunnet endrar seg.
