Sommarparkane i Noreg
Dei kommande vekene kjem me til å presentera kva som skjer, kva som er nytt og kva reglar som gjeld med tanke på smittevern i desse parkane:
- Bjørneparken i Flå
- Hunderfossen i Lillehammer
- Sommarland i Bø
- Mikkelparken i Kinsarvik
- Dyreparken i Kristiansand
- Tusenfryd i Ås
- Kongeparken i Ålgård
Me har tatt ein prat med dei store sommarparkane i Noreg, slik at du og familien din veit kva som møter dykk der, og korleis de må planleggja for å få mest ut av opphaldet.
I dag går turen til Dyreparken i Kristiansand.
Kva skjer i parken?
Dyreparken er ope tolv timar kvar dag i sommar. Du kan sjå dyrepresentasjonar, show og anna underhaldning. Høgdepunktet for mange born, Kaptein Sabeltanns kveldsforestilling i Kjuttavika, har premiere 8. juli.
Kva er nytt i år?
Dyreparken kan også frista med fleire nyheiter i år – mellom anna eit heilt nytt sjørøvarteater i Kaptein Sabeltanns Verden, to nye trua dyreartar og klatring i nærleiken av orangutangane.
Korleis passar parken på smittevern?
Anniken Bjørnstad Schjøtt, som er marknads- og kommunikasjonsdirektør i Dyreparken, seier at dei gler seg over at det blir ein ny sommar med ferie i Noreg.
– Mange valgte Dyreparken som ein del av ferien sin i fjor. Me håpar og trur at dei vil koma tilbake også i år.
Vil du på besøk til Dyreparken, må du bestilla billettar i god tid. Dei avgrensar talet på samtidige gjester i parken, som eit tiltak for å forhindra kø. Kapasiteten i parken vil bli tilpassa i takt med smittevernreglane.
