Birk Phuangkaew Hesjedal (11), Erik Samland Tendal (11) og Tobias Johansen (10) starta i speidaren i 3. klasse.
Kva tenkjer de om fjellvettreglane?
Birk: Vi må sjekke véret, og pakke alt utstyr vi treng.
Tobias: Så må vi pakke god matpakke, og seie ifrå om kvar vi går.
Birk: Det er heller aldri ei skam å snu om det vert dårleg vér.
Her kan du lese fjellvettreglane på nynorsk!
Fyrste tur åleine
Birk: Vi har vore på tur for å overnatte i naturen utan vaksne. Vi skal det natt til 1. mai også.
Tobias: Vi delte på alt vi skulle ha med oss i sekkane våre, og det er berre gruppeleiaren som har mobil.
Speidarane i Skånevik får ikkje vite kvar dei skal gå før same dagen dei legg ut på tur.
Birk: Det er fordi ingen andre skal kunne besøke oss på turen.
Kva utstyr tek de med?
Erik: Til denne turen tek vi med presenning og tau til å lage soveplass. Så har vi med eit førstehjelpsskrin, og øks og sag. Det bruker vi til å lage leiren vi skal overnatte i.
Tobias: Vi legg all maten oppå presenningen for at den skulle halde seg kald. Då er det heller ingen dyr som kan ta den.
Birk: Og speidarkniv har vi med. Den spikkar vi med når vi skal lage bål.
Erik: Vi bruker også kart og kompass.
Tobias: Vi må samarbeide om å finne vegen.
Snarvegen
Birk: Sist vi gjekk på tur sa Tobias at han hadde funne ein snarveg, og då hamna vi ved ei elv vi måtte hoppe over. Planen var å komme ned før jentene.
Erik: Men det gjorde vi ikkje! Jentene var sikkert framme ein time før oss.
Birk: Dei var på veg heim i bilane då vi kom ned. Men, om ikkje elva var i vegen for oss hadde vi nok komme ned til same tid.
Tobias: Hugsar du den natta, Birk?
Birk: Ja, vi måtte gå vakt fordi Erik sa han hadde sett ein bukk som kunne angripe.
Tobias: Så vi måtte gå vakt heile natta. Det var gøy!
Birk: Vi var trøytte dagen etter for å seie det slik.
Så, korleis er det å vera utan vaksne på tur?
Erik: Det er kjekt!
Birk: Då vi gjekk vakt den natta høyrde vi at det kom nokon. Det viste seg å vera læraren vår, men det såg vi ikkje. Så vi hylskreik og gjekk saman for å sjå kven det var.
Eirik: Vi skremmer jo kvarandre opp. Det er gøy å lyse med lommelykta på ting rundt campen. Då seier vi av og til at vi ser ting vi ikkje eigentleg ser – bare for å skape litt spenning.
Gutane sitt beste båltips:
Ta med tørr ved i sekken. Lag ein runding med steinar, og legg veden opp mot kvarandre slik at det ser ut som ein mini-lavo. Så spikkar du av litt av barken. Det er nemleg mykje lettare å tenne på barken.
