Natt til laurdag25. juni vakna heile Noreg til nyhenda om at to menneske er drepne og 21 skadde etter at ein mann byrja å skyta utanfor ein utestad for homofile i Oslo sentrum.
– Etter dei grusame handlingane i natt ønsker me å la alle feira pride over heile landet, i tråd med Oslo Pride og oppmodingane til politiet. Derfor opnar me søndag for digital feiring i Minecraft-versjonen av Oslo, pynta til pridefest. Me håpar mange vil vera med å feira mangfald og kjærleik, seier Tarjei Mo Batalden i Skogliv.
Søndag 26. juni er det mogleg å gå i parade i dataspelet Minecraft. Skogliv har bygd Oslo sentrum, og pynta byen i fargane til regnbogen. Spelarar kan feira med flagg og emojiar.
Om Skogliv
Skogliv er Noregs største Minecraft-samfunn. Under pandemien arrangerte dei digitale 17. maifeiringar, der nesten 40.000 spelarar deltok.
I vår lanserte dei òg eit læringsopplegg om pride og Kim Friele, i samband med 50-årsjubilet for avskaffelsen av homoparagrafen. Skogliv blir drive av Erlend Pilø (26), Tobias Laundal (23) og Tarjei Mo Batalden (23), frå Oslo og Bærum. Også i 2021 arrangerte dei digital Pride-feiring.
Microsoft Noreg har lagt til rette for feiringa.
