I sommar er det duka for fotball-VM i USA, Canada og Mexico. I samband med dette ser den amerikanske sportskanalen Fox Sports etter ein heilt spesiell tilsett.
Dei vil nemleg lønne ein person nesten ein halv million kroner (50 000 dollar) for å sitte på Times Square og sjå alle fotballkampane under VM, skriv NTB.
Times Square er ein open plass midt i den amerikanske storbyen New York. Her er det alltid fullt av menneske, liv, ljos og store TV-skjermar.
Ein historisk sommarjobb
Personen som får stillinga omtalt som Sjef for VM-sjåing, skal sitte i eit gjennomsiktig glasbur. Då er personen synleg for alle som fartar rundt på travle Times Square.
Jobben varar i 39 dagar. Han startar med kampen mellom Mexico og Sør-Afrika 11. juni og varer fram til finalen 19. juli.
