Haaland har teke sju verdsrekordar

Erling Braut Haaland (26) er den fotballspelaren som raskast har scora 100 Premier League-mål og som har scora flest mål i ein Premier League-sesong. I tillegg til desse verdsrekordane har han teke fem andre sidan karriera skaut fart i 2020.

Fotball-ligaer

 

 

LES FAKTALUKK FAKTA

Nyleg overrekte Guinness World Records fire verdsrekordbevis til Erling Braut Haaland. Det var på Etihad Stadium, heimen til Haaland sitt klubblag Manchester City, at fotballstjerna mottok dei fire bevisa.

– Med Erling verkar det som at rekordane aldri er langt unna. Vi gler oss til å sjå kva han gjer vidare, seier Tom Beckerlegge frå Guinness World Records i ei pressemelding.

I oktober kjem Guinness World Records 2027: Fotballutgaven der Erling Braut Haaland er ei av fotballstjernene som prydar framsida.

Omslag: Guinness World Records

Haaland har teke tre andre verdsrekordar i tillegg til dei han nyleg mottok verdsrekordbevis for. Dette er fotballspelaren sine verdsrekordar så langt i karrieren (det er punkt 1, 2, 5 og 7 Haaland tok imot verdsrekordbevis for tidlegare i august):

1Raskaste til 100 Premier League-mål: 111 kampar

2. desember 2025 scora Haaland sitt 100. Premier League-mål etter 111 kampar. Haaland slo Alan Shearer, som scora 100 mål på 124 kampar og sette verdsrekord i 1995.

2Flest mål i ein Premier League-sesong: 36 mål

I løpet av Haaland sin første sesong i Manchester City (2022/2023) scora han 36 mål og sette med det verdsrekorden for flest mål i løpet av ein Premier League-sesong. Liverpool-spelaren Mohamed Salah hadde den førre verdsrekorden med 32 mål i 2017/2018.

3Flest mål i ein debutsesong i Premier League: 36 mål

Haaland sin prestasjon i Premier League-sesongen 2022/2023 resulterte i fleire verdsrekordar: Med sine 36 mål blei han den fotballspelaren som har scora flest mål i løpet av sin første sesong i Premier League.

4Høgaste målsnitt for ein vinnar av Premier League Golden Boot: 1,02 mål per kamp

Premier League Golden Boot er prisen som kvart år blir delt ut til spelaren som scorar flest mål i løpet av ein Premier League-sesong. Med 36 mål på 35 kampar i debutsesongen 2022/2023 fekk Haaland Premier League Golden Boot og sette ny verdsrekord når det gjeld talet på mål per kamp for ein vinnar av denne prisen.

5Flest mål i UEFA Nations League: 19 mål

Mellom september 2020 og november 2024 scora Haaland 19 mål i UEFA Nations League. Han slo med det den førre verdsrekorden på 15 mål, som var sett av portugisiske Cristiano Ronaldo.

6Raskaste hat-trick i ein Bundesliga-debut: 19 minutt og 48 sekund

Eit hat-trick betyr at ein fotballspelar scorar tre mål i løpet av ein og same kamp. Det var under ein kamp for Borussia Dortmund i januar 2020 at Haaland scora tre mål på 19 minutt og 48 sekund.

7Flest mål i ein UEFA Champions League-kamp: 5 mål

14. mars 2023 scora Haaland fem mål i løpet av éin Champions League-kamp mot RB Leipzig. Denne verdsrekorden deler Haaland med argentinske Lionel Messi og brasilianske Luiz Adriano.