Purim er ei jødisk høgtid som feirar ei modig kvinne som heitte Ester. Ho var ei jødisk dronning, og ifølgje historia redda ho jødane frå å bli plyndra og utrydda av den onde Haman.
Haman var persarkongen Xerxes 1 sin minister. Ester ba kongen om å verna det jødiske folket, og det heile enda med at kongen gav jødane løyve til å forsvara seg. Til slutt blei Haman hengd.
Gledesdag
Reglane for korleis dagen skal feirast finst i traktaten Megilla i Talmud, som fastslår at alle jødar, både barn, kvinner og menn, er forplikta til å høyra opplesnaden av Esters bok på denne gledesdagen. Talmud er den viktigaste skriftsamlinga i jødedommen.
Under høgtida feirar jødane med fleire tradisjonar:
- Historia om Ester blir lese i synagogen.
- Dei gir gåver til både familie og dei som treng hjelp.
- Dei et den tradisjonelle matretten kalla hamentashen. Det er små kjeks som liknar på Haman sin hatt.
- Mange kler seg ut i kostyme for å feira.
(Kjelder: Snl.no, Wikipedia)
