Denne oppskrifta frå Fuglevennen.no er superenkel og gøy å laga.
1. Du treng berre tre ingrediensar til denne meisebollen: 500 gram matfeitt, 200 gram lettkokte havregryn og 300 gram solsikkefrø utan skal.
2. Smelt feittet med låg temperatur i ein kasserolle. Følg med heile tida, og aldri forlat kasserollen før steikjeplata er slått av.
3. Bland saman dei tørre ingrediensane og feittet, og rør godt. Set blandinga til side, men hugs å røra innimellom. Blandinga må ikkje stivna.
4. Finn to pinnar på 18-20 cm. Skjær gjerne ut ei fordjuping i midten på dei begge. Legg dei to fordjupingane mot kvarandre slik at pinnane ligg i eit kryss.
5. Bruk hyssing til å binda saman pinnane. Sørg for at tråden er lang nok til å brukast som oppheng. Hyssingen som skal brukast til oppheng bør sentrerast, slik at meisebollen heng nokolunde i vater.
6. Når meisebolleblandinga har avkjølt seg (20-30 minutt), er den klar til å “monterast” på trekrysset. Tenk at du skal laga ein snøball med eit trekryss inni. Klatt på masse og form den til.
7. La meisebollen stivna før du hengjer den opp. Heng den gjerne opp i eit tre, ute på ei grein, slik at fuglane er trygge for til dømes kattar.
8. No er det berre å ønskja velkommen til dekt bord, og kryssa fingrane for at det kjem mange artar. Hugs å notera det du observerer, og rapporter det etterpå til www.fuglevennen.no.
(Kjelde: Fuglevennen.no)
