Kva skjer?
– Eddik er ei sur væske, som består av eddiksyre og vatn. Den sure eddiken løyser opp eggeskalet, men etterlèt den tynne eggehinna på egget. Eggeskalet er i hovudsak sett saman av kalk. Når kalken kjem i kontakt med den sure eddiken, løyser skalet seg opp og det blir danna karbondioksid (CO2). Karbondioksid ser du som dei små boblane på skalet når egget ligg i eddiken, seier Ane.
Du treng:
- Eit egg
- Eit glas
- Eddik (7 %)
- Tolmod!
VIKTIG! Det er viktig at det står 7 % på eddiken du brukar. Eddikessens (35 %) er etsande og kan skada hud og auge. Spør ein vaksen om hjelp om du er i tvil!
Slik gjer du:
Legg egget forsiktig ned i glaset.
Hell eddik i glaset til det dekker egget.
Viss egget flyt opp, legg noko oppå det slik at egget blir liggande under overflata.
La egget liggja i eddik over natta.
Når du ser at eggeskalet er byrja å bli borte, tømmer du ut eddiken og skyl egget forsiktig i vatn.
No er egget nakent, og du kan testa om det sprett. Slepp egget ned i vasken frå cirka 10 cm høgde. Det kan gå gale viss egget sprett for hardt, så det er lurt å gjera dette i vasken.
EKSTRATIPS: Prøv og la egget liggja i eddik i 2–3 dagar, for å få skalet til å forsvinna heilt!
