Tårnagenthelg er ei helg for alle 8-åringar. Gjennom oppdrag og mysterium får barna løysa oppdrag gjennom å utforska av kyrkja, klokketårn, symbol og bibelforteljingar.
– Me brukte ein heliumballong, og målte med ein tråd kor høgt det var opp til taket i kyrkja, fortel Olav Andresen (8 1/2) i Stord kyrkje.
Tråden målte 13,5 meter.
På leiting
Ein heil laurdag ettermiddag og kveld var 8-åringane i Stord kyrkje. Om kvelden fekk dei pizza.
– Me leita etter ting i kyrkja, fortel Silas Milje-Helmersen. På preikestolen fann dei Bibelen og to lysestakar.
– Me såg òg eit drikkebeger i sølv og ei skål med sånne kvite greier som skal vera brød, fortel Olav. Oblat heiter det.
Svimlande høgt
– Kva har de lært på tårnagenthelga, då?
– Eg har lært at eg ikkje vil hoppa i fallskjerm, seier Olav Andresen.
Det var høgt å sjå ut vindauget ned frå kyrkjetårnet.
Og så har dei lært om Jesus. Dei skulle finna ord som mangla i eit bibelvers. Det klarte dei fint.
Søndagen fekk dei synga framfor kyrkja.
– Og korleis var det å vera med på tårnagenthelga?
– Det var gøy! seier Silas og Olav i kor.
