Interneringsleiren som blir kalla «Alligator Alcatraz» skal kunne huse rundt 5000 immigrantar på same tid.
Ein interneringsleir er eit fengsel der ulovlege immigrantar vert haldne utan at dei er dømde for noko kriminelt. Ein ulovleg immigrant er ein person som har kome til eit land og busett seg der, utan å ha dei rette papira i orden.
Trump drog for å besøke leiren på tysdag.
Midt i ein sump
Grunnen til at interneringsleiren vert sett opp her, er fordi området er omringa av ein sump. I denne sumpen bur det massevis av alligatorar og pytonslangar.
Regjeringsadvokat i Florida, James Utheimer, er ikkje bekymra for at dei ulovlege immigrantane skal rømme, fordi det ikkje er «mykje anna enn alligatorar og pytonslangar som ventar dei».
Grunna dei mange alligatorane i sumpen, har dei brukt «alligator» i kallenamnet til den nye interneringsleiren.
Homeland Security har til og med gått så langt som å poste eit KI-generert bilete av alligatorar med caps.
Vil gjenopne gamalt fengsel
Bruken av namnet «Alcatraz» kjem frå ei øy i San Francisco. Øya vart brukt som fengsel for nokre av dei mest berømte kriminelle i USA for over 60 år sidan.
No er øya open for turistbesøk.
Trump har snakka om at han vil gjenopne Alcatraz som fengsel og bruke det til same formål som tidlegare; dei verste kriminelle i USA.
Protestar
Fleire protesterar mot det Utheimer kallar ein mellombels interneringsleir. Dette er mellom anna på grunn av dyra og menneska som lever i reservatet rundt leiren.
Gruppa «Friends of the Everglades» (venar av Everglades) skreiv eit ope brev til James Utheimer og guvernøren i Flordia, Ron DeSantis. I brevet oppmodar gruppa til å la området vere, og seier at det er «eit av USA sine mest sårbare og ikoniske økosystem».
Miljøet er ikkje det einaste som vekkjer oppsikt. Også behandlinga av menneske blir snakka om. Politikkanalytikar Thomas Kennedy seier til CNN at å huse fleire tusen i telt midt på sumaren i Florida må stoppast. Både varme og ekstremvêr er store problem i dette området.
– Det er ingenting ved denne interneringsleiren som ikkje er vondskapsfullt og umenneskeleg, seier Kennedy.
