Over 30 år etter krigen i Kroatia er landet no erklært minefritt, skriv Verdens Beste Nyheter.
Ei landmine er ein type bombe som ligg skjult i bakken. Landmina kan eksplodera om nokon trakkar på ho eller kjem borti ho. Derfor er miner veldig farlege, også lenge etter at ein krig er over.
Under krigen på 1990-talet vart det lagt ut mange miner i Kroatia. I mange år har det vore farleg å bevega seg i enkelte område.
No er alle miner fjerna etter fleire tiår med rydding.
Kan venda heim igjen
Når miner blir fjerna, blir det trygt for menneske å bu og leva der igjen. Det betyr at familiar kan flytta tilbake til heimane sine, og lokalsamfunn kan byggjast opp igjen.
Å fjerne miner tek lang tid og er farleg arbeid. Men det er viktig for å skapa tryggleik etter krig.
