Fakta om forfattaren:
- Thomas Brunstrøm er ein dansk forfattar.
- Han er også utdanna journalist og jobbar som freelancejournalist og filmmeldar.
- Tidlegare har han mellom anna skriva den morosame og kritikarroste Sallys Pappa-serien.
Boka til Thomas, «Verdens villeste banditter», handlar om alt mogleg slags rampete folk – frå små luringar til storsvindlarar. Ein av dei selde Eiffeltårnet. To gonger. Utan at han eigde det.
– Boka handlar om tjuvar og røvarar og alle slags folk som har gjort ting ein ikkje har lov til, forklarer Thomas.
– Ofte på ein måte som gjer at ein nesten blir litt imponert. Til dømes han som selde Eiffeltårnet – sjølv om det ikkje var hans! Det er slemt, men ganske genialt òg, held han fram.
Fascinert av det forbodne
Han har alltid vore fascinert av det som er forbode. I tillegg til boka om bandittar har han tidlegare skrive ei bok om banneord.
– Eg synest ting som er forbodne, er veldig spennande. Derfor ville eg utforska kvar banneord kjem frå, kva dei betyr og korleis ein banner i andre land, fortel han.
Sjølv om den nye boka handlar om kriminelle, er ikkje Thomas bekymra for at barn skal få dårlege idear.
– Nei, slett ikkje. Eg er heilt sikker på at norske barn veit at det er gale å stela og lura andre. Men det betyr jo ikkje at det ikkje er spennande å lesa om dei som gjer det. Kunnskap er alltid bra – også om dårlege ting. Eg synest til dømes at ein bør læra om Adolf Hitler, sjølv om det er ein superdårleg idé å vera nazist, seier han.
Ingen skam
Han har heller ingen problem med å gjera kriminelle handlingar morosame i ei barnebok.
– Det skammar eg meg på ingen måte over!, seier han bestemd.
Mange ville kanskje tru at foreldre og lærarar kunne vorte bekymra for innhaldet i boka. Men det har ikkje Thomas merka noko til.
– Eg har ikkje fått éin einaste negativ reaksjon frå verken lærarar eller foreldre. Kanskje det er fordi me i Danmark ikkje er så bekymra for sånne ting. Me har ein lang tradisjon for barnebøker og barne-TV der hovudpersonane ikkje nødvendigvis er heilt perfekte.
Det perfekte kuppet
Han trur det er noko med bandittar og skurkar som fengjer fantasien til både store og små.
– Veldig mange – både barn og vaksne – dagdrøymer om å gjera det perfekte kuppet. Du veit, å stela mange millionar på ein supersmart måte og så leva resten av livet på ei tropisk øy. Dei fleste gjer det jo aldri, men det er gøy å tenkja på.
Forfattaren har ein favorittbanditt.
– Favorittbanditten min er nok Yoshie Shiratori, som rømde frå fengsel fire gonger på veldig listige måtar. Eg veit jo at når ein først har vorte sett i fengsel, så skal ein helst sitja der til ein blir sleppt ut, men eg forstår godt trongen til å rømma.
Skriv kvar dag
For barn som drøymer om å bli forfattarar sjølv, har han eit enkelt, men viktig råd:
– Skriv, skriv, skriv! Det å vera forfattar er akkurat som å spela fotball eller gitar. Jo meir du øver, jo betre blir du.
Sjølv skriv han kvar einaste dag, anten han kjenner seg inspirert eller ikkje.
– Dette er jobben min, og eg har alltid fleire bøker eg har lova å levera. Viss eg berre skreiv når eg hadde lyst, ville redaktørane mine vorte ganske sure! Så eg skriv – kvar dag.
