Ny studie: Så gamal er hunden din i menneskeår

Visste du at hugseregelen om at eitt hundeår tilsvarer sju menneskår berre er ei myte? No har ny forsking funne korleis ein faktisk kan rekne ut ein hund sin menneskealder.

I ein studie gjennomført frå University of California San Diego, forsøkte forskarar å finne ein formel på korleis ein kan rekne ut ein hund sin alder i menneskeår, skriv forskning.no.

Det var hunderasen labrador retriever, som i gjennomsnitt lever i 12 år, som blei forska på. Dette då dei har ein temmeleg gjennomsnittleg levealder for hundar.

Samanlikna aldring hos hundar og menneske

I studien samanlikna forskarane hundar og menneske sin aldring. Då fann dei ein ikkje-lineær samanheng mellom livssyklusen til labradorar og livssyklusen til menneske.

Det vil seie at ein ikkje kan seie at eitt hundår svarer til eitt bestemt tal menneskeår. I staden varierer det kor mange menneskeår eitt hundår svarar til utover i hunden sitt liv.

HUNDEALDER OG MENNESKEALDER: Denne grafen viser forholdet mellom hunden og mennesket sin livssyklus. Til dømes ser ein at når hunden er 4 år svarer det til litt over 50 menneskeår. Grafikk: Wang et al.

5 hundeår = 56 menneskeår

Formelen forskarane kom fram til viste at i løpet av ein labrador sitt første leveår, eldast han over tretti menneskeår.

Året der hunden går frå å vere fire til fem, eldast han berre med eitt par menneskeår. Ein labrador på fem år er 56 år i menneskeår, ifølgje forskinga.

Sidan studien er gjort på hunderasen labrador, viser ikkje grafen på bildet over nøyaktig menneskealder på hunderasar som lever kortare eller lenger enn labradorar.