Denne saka er henta og korta ned frå den opphavelege versjonen som vart publisert hjå Framtida.no.
Du har kanskje høyrd om eller sjølv vore med i elevrådet på din eigen skule. Elevorganisasjonen (EO) er litt som eit elevråd for alle elevar i heile Noreg. Dei jobbar for at elevar sine stemmer skal bli høyrde i saker som påverkar kvardagen deira.
Framtidas Noreg
Hjartesaka til Lona er at alle elevar sine ønske skal bli høyrde og respekterte. Han meiner dette er den viktigaste grunnsteinen som må på plass for å sikre demokratiet.
– Nettopp fordi det vil sørgje for at elevane, som er framtidas Noreg, har tru på og motivasjon til å delta i demokratiet.
Samstundes synest EO-leiaren at det er viktig at alle elevar har like føresetnader for å delta i skulen.
– Dette gjer vi ved å ha trygge klasserom som alle har råd til å lære i.
Nokre av sakene han er oppteken av, er at dagens eksamen blir avvikla, at fråværsgrensa blir fjerna og kampen mot forfallet av norske skulebygg.
– At over 110 000 elevar går på skule i bygg med alvorlege feil på luftanlegg og varmeanlegg er ein tragedie i mine auge.
Les meir: Operasjon Dagsverk går til colombiansk ungdom
Kampen mot arbeidsbrakka
Petter Andreas Lona har engasjert seg for elevars rettar heilt sidan barneskulen.
– Det starta med at vi elevane blei trakasserte av bebuarane på ei arbeidsbrakke på skulevegen. Vi kjempa i fem år for å rive den arbeidsbrakka.
Etter at han byrja på ungdomsskulen, vart arbeidsbrakka fjerna. Det motiverte Lona til å stille som elevrådsleiar på ungdomsskulen, for å kjempe mot mobilfri skule.
No tar han steget opp, og representerer elevar i heile landet. Den påtroppande leiaren i Elevorganisasjonen vil vere ein leiar som møter medlemsmassen.
Les om forgjengaren til Petter Andreas Lona
Elevar tar opp saker på TikTok
Lona ser opp til alle på hans alder som er aktive i media, anten som spaltistar eller kommentatorar, og som tør å stå i stormen uansett kva meiningane deira er.
Sjølv held han seg oppdatert ved å lese dei største avisene om morgonen. Han plar òg å googla ord som «skule», «elev» og liknande, for å finne ut kva som blir mest lese for augeblinken.
– Eg følgjer også mykje med på TikTok og Instagram for å høyre kva problem som opptek einskildelevar. Det er overraskande kor mange saker elevar sjølv tar opp i sine sosiale medium før det når nasjonale medium.
