Torsdag 1. desember møtest Costa Rica og Tyskland under fotball-VM i Qatar. Der verdsmeisterskapet har hausta mykje kritikk og blir sett på som kontroversielt, er denne kampen historisk av heilt andre årsaker.
Dommaren i oppgjeret på Al Bayt-stadionet er nemleg franske Stéphanie Frappart. Ho er med det den første kvinnelege hovuddommaren i eit fotballverdsmeisterskap for menn.
Fleire kvinner på bana
I tillegg er det to andre kvinnelege hovuddommarar med i meisterskapet. Dei har så langt i turneringa ikkje vore på bana som hovuddommarar. Tre av 36 hovuddommarar er altså kvinner.
I tillegg er det tre kvinnelege assistentdommarar, ofte kalla linjedommarar, i VM-troppen.
– No viser vi klart og tydeleg at det er kvalitet, ikkje kjønn, som tel for oss, seier Fifa-topp og tidlegare dommar Pierluigi Collina, ifølgje NTB.
Når Costa Rica møter Tyskland 1. desember, er det med eit heilt kvinneleg dommarlag på bana.
Historisk dommar
VM-kampen i Qatar er ikkje første gong Stéphanie Frappart skriv historie. I 2019 vart 38-åringen historisk som første kvinnelege dommar i den franske toppdivisjonen for menn, Ligue 1.
I 2020 vart ho første kvinne som dømte ein Champions League-kamp, og i mai i år var ho dommar i den franske cupfinalen.
Den franske dommaren har allereie hatt rolla som fjerdedommar under kampane Mexico-Polen og Portugal-Ghana i Qatar-gruppespelet.
