Elly slår opp auga klokka 7 kvar morgon.
– Eg vaknar av vekkarklokka, men eg likar å liggja lenge i senga, og så brukar eg ganske lang tid på badet. Eg pussar tenner og kler meg før frukost, fortel ho.
– Me brukar lang tid på å eta i lag. Dagen før har me lagt fram klede og mamma eller pappa har smurt matpakke, så det slepp me å bruka tid på, fortel ho.
Klokka 8.15 går ho ut døra for å rekka skulestart. Men, kva er Elly sitt beste tips til deg som vil ha ein god morgon?
– Et ein god frukost, og å finna kleda fram kvelden før.
Vil leika før skulen
Fie likar også å bruka god tid på å komma seg ut av senga, men ho er hakket raskare enn Elly, fortel ho.
– Då det skulle komma ein fotograf frå avisa her, for å ta bilder av oss, spratt me opp av senga begge to. Men vanlegvis brukar eg litt tid, seier ho.
Saman med Elly og vetlesystra Lisen (2) et ho ein god, lang frukost før skulen.
– Eg likar best å vera rask ut døra, slik at eg kan leika litt på morgon-SFO før skulen startar, men det er ikkje alltid det går.
– Viss me stressar på morgonen synest eg det er kan vera vanskeleg å gå frå mamma eller pappa når dei leverer oss på skulen. Alt går betre når me har hatt ein god morgon, fortel Fie.
