Desse jentene har ein iskald hobby: – Veldig deilig når du kjem uti

– Me måtte tenkja før me sa ja til å prøva, for det er jo litt skummelt når det er så kaldt at du må hugsa på å pusta, seier Kaia Helleland Haugo (12), Hannah Liodden Skjellanger (12) og Live Lund-Roland (12).

Dei tre tøffe jentene frå Nesbyen har starta med ein kald hobby i vinter. Det er berre éin grad i vatnet der dei badar. 

– Det er veldig kaldt, og då er vanskeleg å pusta. Viss ein badar ofte, kan ein læra seg til å bli betre til å slappa av i pusten, seier Hannah.

Les også: Dette skjer med kroppen din når du isbadar

– Mammaen til Kaia påverka oss

Det heile starta då mammaen til Kaia, som heiter Ingrid, starta med vinterbading i haust. Jentene syntest det såg spennande ut.

– Eg har hatt lyst til å testa det heilt sidan mamma starta, seier Kaia før Live raskt legg til:

– Mammaen til Kaia påverka oss, rett og slett.

Første gongen dei testa vinterbadinga, var jentene ute i vatnet i om lag fem sekund. Det var nok. Men då dei prøvde til att, var dei i vatnet litt lenger. Opplevinga av det iskalde vatnet mot kroppen, er det fleire unge som har starta med i vinter.

Godt og forfriskande

Nyleg kom det fram at éin av fem unge i Noreg har lyst til å isbada. Jentene trur at noko av grunnen er at fleire vaksne allereie driv med isbading, og at det påverkar barn og ungdom. For dei har det i alle fall gitt meirsmak.

– Eg vil halda fram. Det er veldig deilig når ein kjem uti, seier Hannah, medan dei to andre friskusane nikkar einig.

Kaia skildrar kjensla av det kalde vatnet som godt og forfriskande.

– Og så får me kakao og kaker når me kjem på land. Heile opplevinga gjer at me vil halda fram, seier ho.