Elevrådet på Skånevik skule bestemte seg for at ein vennebenk kunne hjelpe dei som kjenner seg åleine i friminutta. For alle kjenner på den kjensla av og til.
– På vennebenken kan dei som treng nokon å leike med setje seg, slik at andre kan invitere dei med i leiken, fortel rektor ved skulen Anne Lise Huneide.
Vennemaskin
- klasse på Skånevik skule har brukt benken ei stund.
– Viss nokon set seg på vennebenken, kan andre spørre om dei vil leike, fortel Marta Majer (7).
– Ja, viss nokon er åleine kan dei berre setje seg på benken, så kjem nokon bort, seier Anna Garvik Arefjord (7).
– Det er som ein vennemaskin vi kan bruke, ler Jonas Lygre (7).
– Vi kan bruke den i friminutta og når vi har trivselsleikar på skulen, seier Joakim Moe Tungesvik (7).
Ser godt etter
Men ein ting som er viktig å tenkje på er: Korleis sørgje for at ingen vert sitjande der åleine, utan at nokon kjem bort? I Skånevik har dei snakka om at dei må sjekke om det sit nokon på benken.
– Vi kikar ofte bort – slik at ingen blir sitjande utan at nokon kjem, fortel Milla Holmedal Åsheim (7).
– Ja, vi går bort uansett om det er nokon vi kjenner eller ikkje. Ein gong eg sat på benken kom ein som heiter Vegard bort for å spørre om eg ville vera med på trivselsleikane, fortel Milla.
– Det var faktisk nokon frå 6. klasse som kom då eg sat der. Eg kjente dei ikkje frå før, fortel Marta.
Ho synest det var kjekt å få nye vener i 6. klasse.
– Viss nokon ikkje kjem bort når ein sit der, kan ein berre reise seg opp for å gå bort til nokon som leikar, og spørre om å få bli med. Det går fint det óg, seier Anna.
God idé
– Syster mi, Lineah, var ein av dei som kom på at vi skulle ha ein vennebenk på skulen, fortel Leander Funderud (7).
Idéen kom opp i elevrådet og dei som har arbeidslivsfag på ungdomsskulen laga ein gammal benk om til å bli ny.
– Det er flott at vi har ein vennebenk, seier Jonas.
