Det vil vere talar og musikk i forkant av rosetoget ved arrangementet som skal haldast sundag 31. august. Innslaga vil vere på Youngstorget i Oslo.
Vil fargeleggje byen i gult
Biletet av ei smilande Tamima har florert på nettet denne veka. Ho står i fargerike klede, med ein gul bukett i handa.
Nokre venar har fortalt at yndlingsfargen til Tamima var gul.
«Gulfargen representerer alt hun var. Favorittfargen hennes var gul. (…) Hun var en solstråle» står det sitert på nettstaden til Antirasistisk Senter.
Derfor oppmodar markeringa alle som deltek, om å møte opp i noko gult, om det er klede eller blomar.
Ein av dei største markeringane i vår tid
Med over 100 organisasjonar og aktørar påmeldt markeringa, ventar arrangørane at det vil kome fleire tusen personar. Dei ber folk møte i god tid.
«Vi oppfordrer alle til å ta med gule roser eller blomster, som symbol på fellesskap, solidaritet og kjærlighet,» skriv Antirasistisk Senter.
Med så mange som har slutta seg til, skriv Antirasistisk Senter at det ligg an til å bli ein av dei største antirasistiske markeringane i vår tid.
Det er ikkje berre i Oslo det vil vere markeringar. Antirasistisk Senter informerer om at fleire stader i Noreg vil ha sine eigne markeringar. Også dei lokale markeringane vert oppmoda om å bruke gult.
«For å heidre [Tamima sitt] liv og stå samla mot hat og rasisme.»
Terrorsikta gjerningsmann
24. august vart Tamima drepen medan ho var på jobb. Personen som drap ho, Djordje Wilms (18), er sikta for drap og terror. Å vere sikta tyder at politiet har nok bevis til å tru at det er Wilms som har drepe Tamima, men dommen vil ikkje kome før det har vore ei rettssak. Desse sakene tek ofte lang tid.
Politiet meiner at motivet hans, altso grunnen til kvifor han drap ho, er fordi han ønskjer å spreie frykt i samfunnet for dei med same minoritetsbakgrunn som Tamima. Derfor er han òg sikta for terror.
Frå informasjonen som er henta inn av politiet så langt, hadde gjerningsmannen eit ønske om å dra vidare til ein moské for å skade fleire menneske.
Wilms har sjølv sagt at han drap Tamima, men seier at han ikkje bør straffast for det.
