FramtidajuniorNyhendeTranskjønna tenåringar kjempar mot Trump sitt forbod i jentesporten
UTESTENGD: – Eg føler at eg blir utestengd av Trump og heile lovsystemet for noko eg ikkje kan kontrollera, seier Tirrell. Parker Tirrell, Foto: AP Photo / Charles Krupa
Transkjønna tenåringar kjempar mot Trump sitt forbod i jentesporten
Parker Tirrell (16) og Iris Turmelle (15) er to transkjønna tenåringar frå New Hampshire. Dei utfordrar president Donald Trump sitt forbod mot at transkjønna jenter kan delta i jenteidrett.
FAKTA: Om transpersonar
Ein transperson er ein person som ikkje føler at kjønn dei vart fødde som, er det same som det kjønnet dei føler at dei er. Til dømes dersom nokon blir fødd som ei jente, men kjenner seg meir som ein gut, eller dei kjenner seg verken som ei jente eller ein gut.
Ein transperson kan velja å endra på måten dei ser ut, eller på andre måtar vise kven dei eigentleg er, for å kjenna seg meir komfortabel.
Det er viktig å respektera korleis folk kjenner seg og kven dei er, same kva dei heiter eller ser ut som.
LES FAKTALUKK FAKTA
Parker Tirrell, som har spelt fotball sidan ho var 4 år, fortel at livet hennar vart forvandla etter at Trump signerte ordren om at transkjønna ikkje kan delta i jenteidretten. Inntil i fjor var det ikkje noko problem for Parker å spela fotball saman med fotballaget ho er ein del av.
– Eg levde livet mitt som ein vanleg person. Eg vart akseptert. Eg hadde eit fint, stødig lag som eg spelte på heile tida, seier ho til The Associated Press.
KJEMPAR: Parker Tirrell kjempar for å spela fotball på jentelaget. Foto: AP Photo / Charles Krupa
Hindring etter hindring
Så kom fleire hindringar. Det starta med eit statleg forbod mot transkjønna jenter i jenteidrett, og så kom president Donald Trumps sin ordre som vert kalla «Keeping Men Out of Women’s Sports». På norsk betyr det betyr «Hald menn ute av kvinnesport».
Saman med venninna Iris Turmelle, som også er transkjønna, har ho kjempa mot dei nye lovane. Begge jentene skildrar dei siste åra som stressande og overveldande.
– Me er menneske, akkurat som deg, seier IRIS.
Iris Turmelle kjempar saman med Parker. Foto: AP Photo / Robert F. Bukaty
– Eg føler at eg blir utestengd av Trump og heile lovsystemet for noko eg ikkje kan kontrollera, seier Parker.
– Det kjennest berre ikkje bra. Det er ikkje bra. Det kjennest som om dei berre ikkje vil at eg skal eksistera. Men eg kjem ikkje til å slutta å eksistera berre fordi dei ikkje vil at eg skal det, held ho fram.
No har dei begge saksøkt staten dei bur i, og fått ei rettsavgjerd som tillèt dei å spela på jentelaget.
Rettferd og tryggleik
Støttespelarar av Trumps forbod meiner at det handlar om rettferd og tryggleik i kvinneidrett. Trass i dette, påpeikar begge tenåringane at dei ikkje kjenner dei har nokon urettferdig fordel.
– Viss det ikkje var rettferdig, så veit eg ikkje kva du vil ha frå meg, seier Iris, som ikkje kom med på softball-laget i fjor.
SIGNERTE: 5. februar 2025 signerte president Donald Trump ordren som hindrar transkjønna kvinnelege idrettsutøvarar frå å konkurrera i sport for kvinner eller jenter. Foto: AP Photo / Alex Brandon
I boka «Sprettball» møter me Lotte, ei jente som prøver å finna fotfestet etter at foreldra hennar skil lag. Men, kva skjer når alt rundt henne endrar seg? Med nye heimar, nye venner og ei kjensle av å ikkje passe heilt inn?