17. januar tredde FNs havavtale i kraft. Havavtalen har reglar for naturvern i det opne havet. Det opne havet er det som ingen land eig. Det utgjer nesten halvparten av jordoverflata.
Havet treng vern fordi mange artar er utryddingstrua. Dei største truslane mot havet er klimaendringar og overfiske, skriv FN.
Avtalen har blitt jobba med i 20 år. I juni 2023 blei EU og over 80 land einige, og førre helg tredde havavtalen i kraft. Det betyr at no gjeld han.
Vil verne 30 prosent innan 2030
I 2022 blei verda einige om å verne 30 prosent av havet i verda før 2030. Den globale havavtalen skal hjelpe til med at vi når dette målet.
– Verda verkar som om ho stadig blir mørkare og mørkare. Det er flest dårlege nyheiter. Så den globale havavtalen, han gir meg skikkeleg, skikkeleg håp. Og det håpar eg det gjer for alle andre som bryr seg om planeten vår, seier fungerande nestleiar i Greenpeace Noreg, Haldis Tjeldflaat Helle til NRK.
