På Eidsvolls plass framfor Stortinget byrja det å regne då partivinnaren av Barnas Val vart avslørt. Men dette var ingen dempar for humøret til dei 200–300 elevane som stod kringom og applauderte.
Blant dei som deltok på resultatdagen var Greverud skole. Framtida Junior fekk snakka med fire av elevane om kva dei tykte om Barnas Val – Ingrid Blom Grafsrønningen (11), Herman Bøckmann Konttorp (11), Nikoline Thornes Muribø (10) og Veronika Popil (11).
Valomat hjelpte å bestemme
Etter å ha funne ut kva barna brydde seg mest om, laga Barnas Val ein heilt eigen valomat for barna. Det var fem tema i fokus: krig og fred, skule, fattigdom og ulikskap, klima og miljø og innvandring og integrering.
– Eg tok valomaten tre gongar. Eg visste ikkje eigentleg kva eg skulle stemme, men sidan eg fekk det same partiet fleire gongar, stemde eg på det, seier Ingrid.
Dei tok alle valomaten for å hjelpe med å avgjere. Faktisk vart valomaten på landsbasis tatt heile 220.000 gongar.
Valomaten kjem med påstandar, så må du velje kva som passar di meining best.
– Kva er viktige politiske tema for dykk?
– Klima og miljø, svarar Nikoline, og seier at ho vil gjerne at Noreg skal slutte med forsøpling.
– Skulen, og å nå klimamåla, svarar Herman.
– At skulen har det bra, og at menneske har bra liv i Noreg, svarar Veronika.
– Kanskje litt meir praktisk skule
Arbeidarpartiet vann Barnas Val, og dei fire er både glade og skuffa over det. Ingrid er ikkje sikker på om det er noko særleg som vil endre seg i skulen, dersom dei vinn stortingsvalet 8. september.
– Det er jo dei som har styrt til no, så eg veit ikkje heilt om det kjem til å endre seg så mykje, seier Ingrid.
– Det blir jo kanskje litt det same, men kanskje litt meir praktisk skule, seier Nikoline.
Herman trur ting vil bli betre.
– Dei syns skulen er ganske viktig, og så vil dei nå klimamåla, seier han.
Gøy å forstå meir
På skulen til dei fire, stemte heile klassa saman i klasserommet.
– Utanom ein, som hadde stemt frå før, forklarar Herman.
– Er de blitt meir politisk interessert no når de har hatt om og vore med på Barnas Val?
– Ja, dei siste to vekene har eg vore det, seier Herman.
– Det har vore gøy å skjønne litt meir om korleis politikarane jobbar og kva dei har lyst til å få til, seier Ingrid.
Veronika fortel at ho er blitt meir politisk interessert etter å delta i Barnas Val.
– Eg blir veldig glad når ein stemmer, seier ho, og legg til at ho gler seg til at ho kan stemme i stortingsvalet.
Det kan desse fire gjere ved stortingsvalet i 2033.
Uvanleg avsløring
Barnas Val valde å vise kva parti som vann på ein uvanleg måte.
Ved hjelp frå dansegruppa Jump Crew, løfta dei opp eit bilete av partileiaren midt i ein koreografert dans.
Stemning på topp
Det var veldig god stemning på Eidsvolls plass. Når dei ulike representantane frå partia kom til området, vart dei møtt med engasjerte rop. Det gjorde politikarane det meste utav!
