Fakta om løver
Art: Panthera leo
Engelsk: Lion
Utbreiing: Afrika og India
Leveområde: Savanne, opent skoglandskap, steppe, halvørken og fjell
Mat: Dyr som mellom anna sebra, gnu, antiloper og impalaar
Vekt: 120–250 kilo
Levealder: 10–20 år
Drektigheitstid: 100–119 dagar, ca. 3,5 månader
Mengd ungar: 1–6 ungar
Status: Sårbar (IUCN Red List)
Mamma Kira og pappa Mufasa har fått fem ungar til. Foreldra kom til Dyreparken i 2022, og dette er deira tredje kull med løveungar. Ungane kan du sjå i videoen frå Dyreparken over.
– Alt ser bra ut til no. Kira er ei roleg og erfaren mor, og passar godt på dei små, seier dyrepassar Trygve Rislå Torkildsen i ei pressemelding.
Kira og Mufasa kom til Dyreparken som ein del av eit internasjonalt bevaringsprogram. Målet til dette programmet er å oppretthalde ein sunn bestand med løver i dyreparkar.
Løver er sårbare og raudlista på Verdas naturvernunion. Dei er òg det einaste kattedyret som lever i flokk.
Normalt får løver 1–6 ungar per kull, medan 2–3 er mest vanleg.
Kira og Mufasa er begge seks år gamle. Det nye kullet veg 1–2 kilogram ved fødselen, og dei vil opne auga sine etter rundt 11 dagar.
– No er det viktig at dei får mest mogleg ro, difor har vi stengt løvehuset for gjestar inntil vidare, seier Trygve.
