Birgit Skarstein har nettopp lagt opp som toppidrettsutøvar innan paraidrett. No skal ho bruke tida på å jobbe for NRK, studere, gi ut bok og vere med familie.
– Det er rart å ha lagt opp, sidan det er intenst å leve på den måten ein gjer som toppidrettsutøvar – det set preg på kva du gjer, kva du et, når du søv, kvar du er, fortel Birgit til Framtida junior.
Gav seg ikkje
I løpet av karrieren har Birgit vunne til saman 12 VM-medaljar og ho er regjerande verdsmeister og verdsrekordhaldar i para-roing.
Birgit trur årsaka til at ho har vorte verdas beste handlar om at ho er veldig god på å ikkje gi seg.
– Eg er god på å reise meg opp igjen etter at ting ikkje har gått heilt som dei skal og finne nye måtar å sjå og løyse ting på.
Idrettsglede saman
Den tidlegare toppidrettsutøvaren rår barn og unge som ønskjer å bli gode i idrett til å finne glede i sporten.
– Finn idrett du synest er gøy og den idretten som gir deg motivasjon og lyst til å fortsette. Og gjer det saman – bruk kvarandre og spel kvarandre gode.
Birgit poengterer òg at det tek tid å bli god, så om det er noko ein ikkje får til, bør ein prøve igjen.
– Det er faktisk veldig nyttig at det ikkje alltid går bra, for da finn ein ofte ut korleis ein kan gjere ting betre neste gong.
Kva er du god på?
Til barn og unge som ønskjer å bli gode, men trur dei ikkje kan, tipsar Birgit om å finne ut kva ein sjølv er er god på og kva eigenskapar ein sjølv har.
– Då har du plutseleg mange moglegheiter. Det er mange grunnar til at ting ikkje kan gå, men det er også mange grunnar til at ting kan gå. Prøv å fokuser på dei, rår Birgit.
