Denne veka er det 40 dagar til påske, ei tid mange rundt om i verda markerer ved å faste. Men før ein går inn i fastetida, er det også tradisjon for ei skikkeleg feiring – karneval.
Fjør og dans
Kan nokon slå brasilianske Rio de Janeiro i paradar – og bruk av fjør? Tvilsamt.
![](https://framtidajunior.no/wp-content/uploads/2024/02/NTB_ulvl6Q79cxY-kopi-900x600-1.jpg)
Her viser ein sambaskule seg fram i gatene med både dans og kostyme.
![](https://framtidajunior.no/wp-content/uploads/2024/02/NTB_gW2flBO18bE-kopi-900x600-1.jpg)
Alle kan delta i dei store gatefeiringane i Brasil.
Masker og mystikk
Venezia i Italia kan briljere med masker. Karnevalfeiringa deira har eit historisk sus over seg, spesielt i år, sidan dei markerer at det er 700 år sidan ein av deira mest kjente innbyggjarar, Marco Polo, døydde.
![](https://framtidajunior.no/wp-content/uploads/2024/02/NTB_QufPmhs2f5E-kopi-900x600-1.jpg)
Byen har ikkje like mange gater som Rio, men kan ta feiringa ut i kanalane!
![](https://framtidajunior.no/wp-content/uploads/2024/02/NTB_JEAFREUhpCc-kopi-900x600-1.jpg)
Fakkeltog i Middelhavet
Fasta, og tida før, er også viktig i den ortodokse kyrkja. Det skjer litt seinare enn i den katolske kyrkja, sidan den ortodokse kyrkja også feirar påska 5. mai i år. Her frå ein fakkelparade i høve karneval på den greske øya Naxos 25. februar i fjor.
![](https://framtidajunior.no/wp-content/uploads/2024/02/NTB_G1qs95FAgUg-kopi-900x613-1.jpg)
Mardi Gras
I meir fransktalande delar av verda er det feitetysdag, eller Mardi Gras, som er den største festdagen. I New Orleans veit dei å feire med jazz, paradar og perler.
![](https://framtidajunior.no/wp-content/uploads/2024/02/NTB_8l0QFG5MO8g-kopi-900x600-1.jpg)
Kano og karneval
I Quebec i Canada er det ikkje kostyma som pregar karnevalet, men ein kanokonkurranse. Tradisjonen tru kjem det deltakarar frå heile regionen som vil kome seg over det iskalde vatnet.
![](https://framtidajunior.no/wp-content/uploads/2024/02/NTB_yWuy1Ei5qOI-kopi-900x642-1.jpg)
Kritikk og karikaturar
I Mainz i Tyskland har dei ein annan tradisjon, og feirar karneval heilt frå november til oskeonsdag. Paradar med satiriske karikaturar er ein kjent del av feiringa. I år kan ein sjå fleire politikarar og verdsleiarar gjennom gatene.
![](https://framtidajunior.no/wp-content/uploads/2024/02/NTB_3-Wck9bQ_q8-kopi-900x618-1.jpg)
Så kva gjer vi i Norden? Dei færraste fastar før påske, men ordet heng sjølvsagt att i fastelavn, når vi skal ete noko av det beste og feitaste som finst. I både Sverige og Noreg kosar vi oss med semlor, eller fastelavnsbollar!
![](https://framtidajunior.no/wp-content/uploads/2024/02/NTB_OFpxmnQyNNs-kopi-900x608-1.jpg)