Sukkerrøyr er eit gras som ikkje gror i Noreg. Derfor hadde me ikkje sukker før på 1600-talet. Då kom det med båt saman med andre, nye matvarer som kaffi, te, krydder og kakao, skriv Ung.Forskning.no.
Sukker var dyrt. Det var ikkje til kvardags.
I rike familiar åt dei konfekt. Dei som ikkje hadde så mykje pengar, kunne suga på sukkerkandis.
Drops fanst i mange fruktmakar, og karamellar kosta heller ikkje så mykje.
Kjærleik på pinne er eigentleg ein drops eller ein karamell sett på ein pinne. Det fanst også i gamle dagar.
På 1800-talet kom melisen, som er finmalen sukker. Då byrja folk å laga marsipan.
Freia var den første sjokoladefabrikken i Noreg. Frå 1889 kunne barn kjøpa mjølkesjokolade.
Den første tyggjegummien i Noreg var Wrigley’s Spearmint. Den andre var Toy og kom på 1930-talet.
Då Noreg vart okkupert av Tyskland i andre verdskrigen, vart det lite sukker. Folk måtte bruka pengar på vanleg mat.
Men etter krigen har norske butikkar fylt opp hyllene med godteri av alle slag.
