Mange av stjernene foreldra dine såg på himmelen då dei var unge, har forsvunne. Altså, dei glødande solene finst framleis. Men det er ikkje lenger mogleg å sjå dei med berre auga, skriv Ung.Forskning.no.
Himmelglød
Dette skjer fordi menneske stadig spreier meir lys frå vindauge, gatelys og skilt. Forskarane kallar det for himmelglød – eller skyglow på engelsk.
Når himmelgløden blir sterkare, blir det vanskelegare å sjå lyset frå stjernene. Blir den sterk nok, vil dei svake stjernene ikkje lenger synest.
Forskarane bak studien har eit døme som kan visa kor raskt forandringa skjer:
Sjå for deg at eit barn blir fødd ein stad der det er mogleg å sjå 250 stjerner på ei klar natt. Når dette barnet har vorte 18 år, synest berre 100 stjerner på nattehimmelen.
Problem for dyr og plantar
Lys og mørke er med på å stilla dei indre klokkene som finst i både dyr og plantar. Når det er lys om natta, kan det bli forvirring.
Dyr og insekt forandrar åtferda si, og fleire studiar viser at lys-forureining kan vera dårleg for helsa.
